Viðurkennir að hafa misnotað ungar stúlkur

Leikarinn Stephen Collins, sem er hvað þekktastur fyrir að leika prestinn í sjónvarpsþáttunum 7th Heaven, játaði fyrir eiginkonu sinni að hann hefði misnotað ungar stúlkur. Játningin er til á upptöku sem fréttasíðan TMZ hefur undir höndum og hægt er að hlusta á hana á síðunni.

Lögregluyfirvöld í New York rannsaka nú leikarann sem stendur í skilnaði við leikkonuna Faye Grant.

Stephen sagði Faye frá því árið 2012 að hann hefði misnotað nokkrar stúlkur undir lögaldri mörgum árum áður. Hjónin fóru til fjölskylduráðgjafa þar sem hún spurði hann út í þetta og hann lýsti misnotkuninni í smáatriðum. Leikarinn vissi þó ekki að eiginkona hans væri að taka það upp.

Í upptökunni á vef TMZ er búið að taka út nöfn á fórnarlömbum leikarans. Á upptökunni játar leikarinn meðal annars að hafa misnotað ellefu ára stúlku.

„Það var ein stund þar sem ég snerti hönd hennar og setti hönd hennar á getnaðarlim minn,“ segir Stephen. Hann segist hafa sýnt stúlkunni lim sinn nokkrum sinnum þegar hún var ellefu, tólf og þrettán ára. Þá spyr Faye hvort honum hafi risið hold þegar hann sýndi henni lim sinn.

„Nei, ég meina nei. Smá, kannski, held ég,“ svarar hann.

Samkvæmt heimildum TMZ er lögreglan búin að yfirheyra Faye um upptökuna og önnur, möguleg vitni. Fórnarlömb leikarans eru talin vera að minnsta kosti þrjú.

Talsmaður Stephens hefur ekki tjáð sig um málið.