Gert að greiða PwC tvær og hálfa milljón

Fyrrverandi starfsmanni PwC var á dögunum gert að greiða 2,5 milljónir króna í bætur fyrir að hafa brotið ákvæði í ráðningarsamningi, samkvæmt dómi í héraðsdómi Norðurlands eystra. Þegar maðurinn, Davíð Búi Halldórsson sem var meðeigandi í PwC sagði upp, hafði hann viðskiptamenn af fyrirtækinu.

 

Frá þessu er sagt í Viðskiptablaðinu.

Davíð var forstöðumaður PwC á Akureyri en sagði upp starfi sínu þann 29. maí 2012 og sagði hann í uppsagnabréfi að við þær aðstæður sem uppi væru hefðu hluthafar ekki virt ákvæði í anda samstarfssamnings og hefði ákveðinn hluti hluthafa ekki sýnt samstarfinu nægilegan trúnað.

Davíð sagði upp störfum þann 29. maí árið 2012 og sögðu þrír starfsmenn fyrirtækisins upp degi síðar. Einn þeirra stofnaði bókhaldsþjónustufyrirtæki sem starfar í nánu samstarfi við endurskoðendafyrirtæki Davíðs. Yfirgnæfandi meirihluti starfsmanna PwC á þeim tíma sem hann sagði upp starfa nú hjá bókhaldsþjónustufyrirtækinu eða endurskoðendafyrirtæki Davíðs.

Davíð var gert að greiða PricewaterhouseCoopers ehf. rúmar tvær og hálfa milljón króna með dráttarvöxtum.