Gera ráð fyrir óbreyttum vöxtum

Hagfræðideild Landsbankans gerir ráð fyrir að peningastefnunefnd Seðlabankans haldi stýrivöxtum óbreyttum á næsta vaxtaákvörðunardegi þann 12. febrúar. Vextir hafa nú verið óbreyttir frá því í nóvember 2012. Þetta kemur fram hagsjá hagfræðideildarinnar.

Verðbólga hefur lækkað og mældist 3,1 prósent í janúar. Opinberar skammtímaspár gera ráð fyrir því að verðbólgan fari töluvert nálægt 2,5 prósent verðbólgumarkmiðinu á næstunni. Samkvæmt skammtímaspá hagfræðideildarinnar mun verðbólgan hjaðna umtalsvert hraðar en Seðlabankinn reiknar með.

„Verðbólguhorfur hafa því batnað töluvert á skömmum tíma. Verðbólgan var síðast undir eða við markmiðið á 1. ársfjórðungi 2011.“