Birgir Leifur ráðinn markaðs- og viðburðastjóri GKG

Kylfingurinn Birgir Leifur Hafþórsson hefur verið ráðinn markaðs- og viðburðastjóri Golfklúbbs Kópavogs og Garðabæjar (GKG). Birgir Leifur hóf störf 1. febrúar síðastliðinn og á að sögn GKG að stýra markaðsmálum golfklúbbsins ásamt því að byggja upp viðburðadeild.

Viðburðadeildin mun samkvæmt frétt GKG veita fyrirtækjum ráðgjöf og leiðbeiningar varðandi viðburði sem fyrirtæki geta unnið í samráði við golfklúbba.

„Þá mun Birgir Leifur vinna með íþróttasviði GKG að því að efla þjónustu við hinn almenna kylfing. Birgir Leifur er ráðinn í hlutastarf og mun áfram sinna atvinnumennskunni," segir á vef GKG.