Golf

Jason Day: "Maður uppsker eins og maður sáir"

Day fagnar titlinum í gær með fjölskyldu sinni.
Day fagnar titlinum í gær með fjölskyldu sinni. Vísir/AP


Ástralinn Jason Day sigraði heimsmótið í holukeppni í gær en þessi 26 ára kylfingur lagði frakkann Victor Dubuisson í gríðarlega spennandi úrslitaleik á Dove Mountain vellinum í Arizona í gær. Day tryggði sér sigurinn á fimmtu holu í bráðabana, eftir alls 23 holu úrslitaleik, en þetta er annað mótið á PGA mótaröðinni sem Day sigrar síðan hann tryggði sér þátttökurétt á henni árið 2010.

Í viðtali við Todd Lewis, fréttamann Golf Channel eftir sigurinn í gær þakkaði Day góðu líkamlegu formi árangurinn um helgina. „Ég spilaði yfir 120 holur við marga frábæra kylfinga í mótinu og það tekur á. Ég er alltaf að leita að leiðum til að bæta mig á vellinum og þessi sigur sannar það bara að ef maður vinnur í öllum þáttum í golfleiknum sínum þá uppsker maður eins og maður sáir. Það hef ég svo sannarlega gert.“



Um mótspilara sinn í úrslitaleiknum, Victor Dubuisson hafði Day ekkert nema gott að segja. „Victor er frábær kylfingur sem sýndi mikið hjarta með því að vinna sig inn í úrslitaleikinn aftur eftir að ég hafði komist í forystu. Hann slóg mörg mögnuð högg og ég hélt á tímabili að þetta yrði ekki minn dagur því hann virtist alltaf koma upp með réttu höggin á réttum tíma. Sem betur fer tókst mér að klára dæmið en ég er viss um að við eigum eftir að sjá hann oftar í baráttunni í stórum mótum.“

Næsta mót á PGA mótaröðinni er Honda Classic sem fram fer í Flóridafylki og hefst á fimmtudaginn en Jason Day mun taka þátt ásamt mörgum af bestu kylfingum heims.

Mest lesið


Fleiri fréttir

Sjá meira


×

Mest lesið