Heimili og fyrirtæki bera 150 milljarða aukakostnað

Íslensk heimili og fyrirtæki bera 150 milljarða króna aukakostnað árlega vegna hærri raunvaxta en í viðskiptalöndunum, samkvæmt frétt á vef Samtaka atvinnulífsins (SA).

Þar er rifjað upp að raunvextir hér hafi verið þremur prósentum hærri en í viðskiptalöndunum á sama tíma og íslensk heimili og fyrirtæki eru mjög skuldug, en þau eiga mikið undir vaxtastiginu. 

SA rifja upp síðustu skýrslu Seðlabanka Íslands um fjármálastöðugleika þar sem kom fram að á miðju ári 2013 hafi skuldir heimilanna numið 108,3 prósentum af landsframleiðslu og skuldir fyrirtækja 165,5 prósent, eða samtals 273,8 prósent.

„Landsframleiðsla ársins 2013 var u.þ.b. 1.820 milljarðar króna þannig að samkvæmt áætlun Seðlabankans hafa skuldir heimila numið 2.000 milljörðum króna og skuldir fyrirtækja 3.000 milljörðum króna, eða samtals 5.000 milljörðum króna. Skuldug íslensk heimili og fyrirtæki þurfa að standa skil á 3% hærri raunvöxtum en að jafnaði í nágrannaríkjunum og samsvarar það 150 milljarða króna vaxtagreiðslum þeirra ár hvert. Þessi fjárhæð, sem nemur 8% af landsframleiðslunni, er einn mælikvarðinn á þann kostnað sem íslensk heimili og fyrirtæki bera af íslensku krónunni," segir í frétt SA.