Sigurður Örn nýr eigandi hjá Rétti

Sigurður Örn Hilmarsson hefur bæst í hóp eigenda hjá Rétti – Aðalsteinsson & Partners ehf., en hann hefur víðtæka þekkingu og reynslu af lögmannsstörfum og hefur starfað á stofunni síðan árið 2009. Sigurður lauk embættisprófi í lögfræði frá Háskóla Íslands árið 2009 og öðlaðist málflutningsréttindi fyrir héraðsdómi sama ár.

Sigurður hefur setið í stjórnum ýmissa félaga og samtaka, en hann var Inspector scholae í MR árið 2002-2003, oddviti Vöku – félags lýðræðislegra stúdenta 2006-2007 og formaður Stúdentaráðs Háskóla Íslands 2006-2007. Þá hefur Sigurður setið í stjórn Íslensk-Japanska félagsins.

Sigurður kennir námskeið í mannréttindum við lagadeild Háskólans á Bifröst og réttarfar við Endurmenntun HÍ.

 

Helstu starfssvið Sigurðar eru málflutningur, fjármuna- og fyrirtækjaréttur, fjármagnshöft og gjaldeyrismál, gjaldþrotaréttur og bústjórn, verktakaréttur, mannréttindi, skaðabótaréttur og stjórnsýsluréttur auk verjanda- og réttargæslustarfa.

Hjá Rétti starfa nú níu lögmenn og eru eigendur nú fjórir, þar af tveir með málflutningsréttindi fyrir Hæstarétti en stofan var stofnuð af Sigríði Rut Júlíusdóttur og Ragnari Aðalsteinssyni.