Ráðin sviðsstjóri hjá Norðurorku

Halla Bergþóra Halldórsdóttir hefur verið ráðin sviðsstjóri þjónustu- og fjármálasviðs Norðurorku hf.

Í fréttatilkynningu Norðurorku um ráðninguna segir að Halla sé viðskiptafræðingur frá Háskóla Íslands. Hún hafi starfað hjá PricewaterhouseCoopers við endurskoðunarstörf og rekstrarstjórnun, fyrst 2000-2004 og síðan aftur 2012-2014, og sem forstöðumaður fjármála hjá Verði vátryggingum 2004-2007. Halla var forstöðumaður fjármálasviðs Saga Capital 2007-2011 en árið 2012 tók hún að sér tímabundið starf sparisjóðsstjóra Sparisjóðs Þórshafnar, en hún hefur starfað í endurskoðunarnefnd sjóðsins.

Halla, sem er gift Brynjari Bragasyni verkfræðingi, var valin úr hópi 39 umsækjenda.

Norðurorka hf. er orku- og veitufyrirtæki sem stofnað var árið 2000 með sameiningu Hita- og Vatnsveitu Akureyrar og Rafveitu Akureyrar.