John Senden sigraði á Valspar-meistaramótinu

Ástralinn John Senden sýndi gífurlega seiglu til þess að vinna Valspar-meistaramótið í golfi sem fram fór á Copperhead vellinum í Flórídaríki og lauk í kvöld. Fyrir lokahringinn hafði Bandaríkjamaðurinn Robert Garrigus eins höggs forystu en það kom fljótt í ljós að lokahringurinn yrði ekki gæfuríkur fyrir hann. Garrigus lék sex fyrstu holurnar á fimm höggum yfir pari og nánast spilaði sig út úr mótinu.

Senden nýtti sér það og með því að vippa í á 16. holu ásamt því að setja niður glæsilegt pútt fyrir fugli á 17. holu kom hann sér í forystu. Með pari á lokaholunni kláraði hann mótið á samtals sjö höggum undir pari og beið eftir því að Kevin Na kláraði sinn hring.

Na setti niður frábært pútt fyrir fugli á 17. holu ásamt sem þýddi að með fugli á 18. holu hefði hann getað náð Senden. Það tókst honum þó ekki sem þýddi að John Senden sigraði sitt annað mót á PGA-mótaröðinni, en hann hefur verið meðlimur á henni í 13 ár.

Næst halda bestu kylfingar heims á Bay Hill þar sem Arnold Palmer Invitational fer fram en Tiger Woods sigraði í mótinu á síðasta ári.