Kron gert að greiða spænskum skóframleiðendum átján milljónir

Íslenska tískuvöruverslunin Kron var í fyrradag dæmd í Héraðsdómi Reykjavíkur til að greiða tveimur spænskum skóframleiðendum, Salvador Sapena og Sapena Trading Company SL, um átján milljónir króna og rúmar 2,2 milljónir í málskostnað.

Skóframleiðandinn Salvador Sapena stefndi Kron ehf. vegna útistandandi skuldar og var málið höfðað þann 27. desember 2012. Í dómi héraðsdóms segir að fyrirtækin tvö hafi átt í viðskiptum á árunum 2008 til 2011 og að eftir standi ógreidd skuld að fjárhæð 51.441 evrur, eða átta milljónum íslenskra króna. Þar segir að Salvador Sapena hafi þann 10. nóvember 2011 sent Kron tölvupóst um að níu mánuðir væru liðnir frá því að framleiðandinn afhenti Kron þær vörur sem skuldin tengdist. Kron svaraði tölvupóstinum einum degi síðar þar sem fyrirtækið sagðist ætla að greiða skuldina en að það væri „einfaldlega ekki forgangsatriði,“ eins og segir í dómnum.

Salvador Sapena sendi Kron annan tölvupóst tíu dögum síðar en fékk engin svör. Fimm mánuðum síðar sendi Salvador Sapena innheimtuviðvörun vegna skuldarinnar og sama dag innheimtuviðvörun vegna skuldar við annað félag, Sapena Trading Company SL, sem er rekið af syni eiganda Salvador Sapena.

Kron var á endanum dæmd til að greiða Salvador Sapena umrædda upphæð og 852 þúsund krónur í málskostnað.

Dómur í deilumáli Kron og Sapena Trading Company var einnig kveðinn upp í Héraðsdómi í fyrradag. Það mál snérist einnig um útistandandi skuld vegna skóframleiðslu þar sem aðilunum tveimur hafði greint á um það hvort ákveðin sending Sapena Trading Company hafi innihaldið gölluð skópör og að spænska fyrirtækið hafi síðan selt gölluðu pörin í sinni eigin smásöluverslun. Viðskiptavinir Kron á Spáni hafi því nánast alveg hætt að panta vörur frá fyrirtækinu og hafi ekki lengur viljað selja skó frá Kron, þegar eins skór voru til sölu á mun lægra verði í útsöluverslunum stefnanda.

Héraðsdómur komst á endanum að þeirri niðurstöðu að dæma Kron til að greiða Sapena Trading Company 64.823 evrur, um tíu milljónir króna, og 1,4 milljónir í málskostnað.