Vísitala neysluverðs lækkar um 0,72% milli mánaða

Vísitala neysluverðs lækkaði um 0,72% í janúar frá fyrra mánuði og er er 415,9 stig. Hagstofan greinir frá þessu.

Vísitala neysluverðs án húsnæðis er 391,5 stig og lækkaði um 1,09% frá desember. 

Víða eru vetrarútsölur og lækkaði verð á fötum og skóm um 10,8%. Flugfargjöld til útlanda lækkuðu um 14,6% milli mánaða og bensín og olíur lækkuðu um 2,5%. Kostnaður vegna húsnæðis, hita og rafmagns hækkaði um 0,6%. 

Síðastliðna tólf mánuði hefur vísitala neysluverðs hækkað um 3,1% og vísitalan án húsnæðis hefur hækkað um 1,9%. Undanfarna þrjá mánuði hefur vísitala neysluverðs hækkað um 0,2% sem jafngildir 0,7% verðbólgu á ári (2,2% verðhjöðnun fyrir vísitöluna án húsnæðis).

Vísitala neysluverðs samkvæmt útreikningi í janúar 2014, sem er 415,9 stig, gildir til verðtryggingar í mars 2014. Vísitala fyrir eldri fjárskuldbindingar, sem breytast eftir lánskjaravísitölu, er 8.212 stig fyrir mars 2014.