Þróaði hugbúnað sem safnar inneign

Íslenska sprotafyrirtækið GoMobile kynnti í vikunni snjallforrit sem heldur utan um endurgreiðslur vegna viðskipta notenda við 95 fyrirtæki hér á landi. Endurgreiðslurnar verða að inneign sem nota má til að greiða fyrir afþreyingu, þjónustu eða tækjabúnað hjá Símanum.

„Þessi hugbúnaður sem safnar peningum er sá fyrsti sinnar tegundar sem við þekkjum til. Með honum geta neytendur búið til ávinning með viðskiptum við samstarfsfyrirtæki GoMobile,“ segir Hálfdán Steinþórsson, framkvæmdastjóri fyrirtækisins.

Hálfdán segir að notendur forritsins fái í flestum tilvikum tíu prósenta endurgreiðslu frá samstarfsfyrirtækjunum. Inneignina má nota hjá Símanum en Hálfdán tekur fram að viðskiptavinir allra fjarskiptafélaganna geti notað forritið.

„Fjarskipti eru orðin svo stór þáttur í lífi okkar, hvort sem það eru bankaviðskipti, afþreying eða kaup á vöru og þjónustu. Öll okkar samskipti fara í gegnum þessi fjarskipti og við fórum því að velta því fyrir okkur hvernig við gætum hjálpað fólki að nota lífsstíl sinn, fara út að borða og gera annað sem maður gerir venjulega, til að fjármagna fjarskipti sín.“