Líkur á lækkun stýrivaxta í maí

Meiri líkur eru á lækkun stýrivaxta í maí samkvæmt Morgunkorni Greiningar Íslandsbanka. Allir meðlimir peningastefnunefndar Seðlabankans studdu tillögu Seðlabankastjóra um óbreytta stýrivexti á fundi nefndarinnar þann 19. mars.

Í Morgunkorninu segir að á fundi nefndarinnar hafi verið rætt um ólíka kosti varðandi breytingu á stýrivöxtum og það megi sjá í fundargerð nefndarinnar.

„Helst þótti koma til álita að halda vöxtum óbreyttum eða lækka þá um 0,25 prósentur. Eru þetta tíðindi, en á síðustu vaxtaákvörðunarfundum nefndarinnar hefur vaxtalækkun ekki komið til álita. Undirstrikar þetta enn frekar þann vaxtalækkunartón sem mátti skynja í yfirlýsingu nefndarinnar vegna síðustu vaxtaákvörðunar, og í orðum Seðlabankastjóra í aðdraganda og samhliða þeirri ákvörðun.“

Þá kemur einnig farm í fundargerðinni að nefndarmenn voru sammála um að verðbólguhorfur hafi batnað. Þó töldu þeir ekki tímabært að lækka vexti, meðal annars vegna þess að verðbólguvæntingar til lengri tíma virtust enn vera töluvert yfir verðbólgumarkmiðinu.