„Verðum að treysta á greið og hindrunarlaus viðskipti“

„Stöðugleiki mun aldrei nást án þess að stjórnvöld hafi hann sem grundvöll,“ sagði Björgólfur Jóhannson, formaður Samtaka atvinnulífsins, í ræðu sem hann hélt á aðalfundi samtakanna í dag.

„Aukin samkeppnishæfi þjóðarinnar,“ var yfirskrift fundarins og sagði Björgólfur að samtökin myndu kynna tillögur um það hvernig Ísland geti komist í hóp tíu samkeppnishæfustu ríkja heims innan tíu ára.

„Peningastefnan verður að vera fastmótuð og tryggja lága verðbólgu og vexti í námunda við það sem gerist í samkeppnisríkjunum,“ sagði Björgólfur í ræðu sinni. „Ábyrg fjármálastjórn og afgangur af rekstri hins opinbera eru lykilþættir. Þrátt fyrir fyrirheit ríkisstjórna í áratugi um ábyrg ríkisfjármál, hefur reynslan sýnt að slíku er vart að treysta. Fjármál ríkis og sveitarfélaga hafa yfirleitt magnað hagsveiflur og stuðlað að óstöðugleika, verðbólgu og háum vöxtum.“

Hann sagði það fagnaðarefni að fjármálaráðherra hafi kynnt frumvörp til laga um betri umgjörð opinberra fjármála, sem hafi í för með sér aukinn aga við framkvæmd fjárlaga.

„Þrátt fyrir þetta er töluverð óvissa framundan í efnahagsmálum. Gjaldeyrishöftin voru upphaflega samþykkt sem tímabundin aðgerð til tveggja ára. Síðan eru liðin rúm fimm ár. Gárungarnir segja að sennilega sé ekkert meira viðvarandi en tímabundnar ráðstafanir hins opinbera.“

Björgólfur sagðist telja það brýnt að ríkisstjórnin eyddi óvissunni og skapaði festu og trú á að efnahagsstefnan tryggi áframhaldandi stöðugleika. Það væri forsenda þess að kjarasamningar tækjust framvegis á svipuðum nótum og síðast.

„Tækifærin eru sannarlega til staðar. Í samkeppni og frjálsum viðskiptum er fólgin besta leiðin til að bæta samkeppnishæfni íslensks efnahagslífs. Við verðum að treysta á greið og hindrunarlaus viðskipti til að bæta hag allra landsmanna.“

Ræðu Björgólfs má lesa í heild sinni á vefsíðu Samtaka atvinnulífsins.