Þrettán ár í að ríkið þarf að greiða LSR 23 milljarða árlega breytist ekkert

Verði ekkert að gert mun ríkið þurfa að greiða 23 til 24 milljarða árlega á núverandi verðlagi eftir árið 2027 til Lífeyrissjóðs starfsmanna ríkisins (LSR), segir Haukur Hafsteinsson, framkvæmdastjóri LSR.

Hann bætir við: „Upphæðin mun þó lækka næstu árin á eftir samfara fækkun lífeyrisþega.“

Ástæða þess er að eignir B-deildar lífeyrissjóðsins verða uppurnar árið 2027. B-deildin hefur lofað lífeyrisgreiðslum upp á 379 milljarða umfram eignir sem munu koma til greiðslu á næstu áratugum. Ríkið er ábyrgt fyrir lífeyrisgreiðslum B-deildar svo ríkið mun þurfa að greiða upphæðina. Upphæðin jafngildir helmingi af útgjöldum ríkissjóðs á einu ári.

Haukur kallar eftir því að ríkið myndi sér stefnu um greiðslur til LSR. „Því fyrr sem ríkið byrjar að greiða til LSR, þeim mun betra. Hefji ríkið greiðslur strax þarf það að greiða 8 milljarða á ári. Upphæðin mun hækka eftir því sem greiðslum er frestað.“

Árið 1997 var lokað fyrir inngöngu nýrra sjóðsfélaga í B-deild LSR. Í B-deild sjóðsins hefur alltaf verið gert ráð fyrir að einungis hluti lífeyrisgreiðslna fjármagni lífeyri en ríkið ábyrgðist það sem upp á vantaði.

Samfara lokun B-deildar var A-deild sjóðsins stofnuð fyrir nýja sjóðsfélaga. Í A-deildinni eiga greiðslur sjóðsfélaga að standa undir réttindum þeirra. Það hefur hins vegar ekki gengið síðustu sex ár.

Árið 2013 voru skuldbindingar A-deildar umfram eignir minni en þau 10 prósenta vikmörk sem kveðið er á um í lögum. Því þarf stjórn sjóðsins að grípa til aðgerða fyrir 1. október.

„Að öðru óbreyttu þarf stjórn sjóðsins að hækka iðgjöld launagreiðenda til sjóðsins til þess að standast lög,“ segir Haukur.

Stjórn LSR hefur óskað eftir fundi með fjármálaráðherra til þess að fara yfir stöðu A- og B-deilda sjóðsins.