Special Tours kaupir helmingshlut í Arctic Sea Tours

Eigendur Special Tours, fyrirtækis sem staðsett er við gömlu höfnina í Reykjavík og sérhæfir sig í sjóferðum fyrir ferðamenn, hafa keypt helmingshlut í Arctic Sea Tours á Dalvík. Frá þessu er greint í fréttatilkynningu Special Tours.  

„Við viljum bjóða fleiri ævintýraferðir á sjó í Eyjafirði og það var okkar markmið að fá einhvern í lið með okkur til að framkvæma það. Viðræður við Special Tours tóku stuttan tíma og það var strax samhljómur í því sem við ætluðum að gera. Við erum því mjög ánægð að tengjast eigendum og starfsfólki Special Tours og spennt fyrir framtíðaruppbygginu í Eyjafirði,” segir Freyr Antonsson framkvæmdastjóri og einn af eigendum Arctic Sea Tours í tilkynningunni.

Þar segir að Freyr Antonsson hafi stofnað Arctic Seatours árið 2009.

„Þetta er einstakt tækifæri fyrir bæði fyrirtækin. Special Tours hefur vaxið hratt og vel undanfarin ár með ferðir sínar frá Reykjavík og bæði fyrirtækin hafa byggt upp mjög gott orðspor, bæði innanlands og utan, í hvalaskoðun og sjóferðum á Íslandi. Má til gamans geta að Arctic Sea Tours er með hæstu mögulegu einkunn á Tripadvisor, sem er vinsælasta ummælasíða heims,“ segir í tilkynningunni.