Wow air ekki til Norður-Ameríku

„Þetta mun hafa áhrif á einhverja 7.000 farþega sem höfðu keypt sér miða. Þetta er nú þegar búið að kosta okkur hátt í 200 milljónir, við vorum komin með flugrekstrarleyfi, búin að setja Evrópuleggina í sölu þannig að það er mjög þungbært að þurfa að beygja sig undir þetta,“ segir Skúli Mogensen, forstjóri Wow air, í viðtali við Markaðinn í dag. Hann er augljóslega verulega svekktur yfir því að Wow air geti ekki hafið Norður-Ameríkuflug eins og til stóð í vor. Fyrirtækið verður einnig að hætta við flug til Stokkhólms en áætlunarflug þangað átti að hefjast 2. júní næstkomandi því ekki er lengur grundvöllur fyrir því að vera með fimm flugvélar í rekstri. 

Geta ekki beðið úrskurðarWow air hafði óskað eftir fjórum brottfarartímum fyrir tvo áfangastaði í Ameríku. Hagstæðast er að flytja farþega til Evrópu að morgni og til Bandaríkjanna síðar um daginn og því mikilvægt fyrir Wow að fá þá tíma til að geta hafið flug til Ameríku. Icelandair mun næsta sumar fljúga til ellefu áfangastaða í Norður-Ameríku og þarf yfir 150 tíma sem eru flestir á sama tíma sem Wow air óskaði eftir. Wow air fékk hins vegar ekki þessa tíma en Samkeppniseftirlitið úrskurðaði í nóvember að Isavia bæri að úthluta Wow air brottfarartímum. Isavia og Icelandair kærðu síðan þá ákvörðun til áfrýjunarnefndar samkeppnismála sem hefur ákveðið að fresta skuli úthlutun þar til endanlegur úrskurður liggi fyrir í málinu.

Skúli segir úrskurð Samkeppniseftirlitsins hafa verið mjög skýran og lögmenn félagsins telji stöðu þeirra alveg ljósa. „Við munum leita réttar okkar í þessu máli,“ segir Skúli aðspurður um hvort félagið muni leita til dómstóla ef á þarf að halda til að fá úthlutað tímum og að krefjast bóta fyrir tjón sem það hefur orðið fyrir. „Það er sérkennilegt að vera í þessari stöðu, ég hef verið í viðskiptum alla mína tíð og tekið alls kyns slagi og finnst afar sorglegt að vera núna eins og einhver vælukjói út af deilum við opinbera stofnun.“

Leifsstöð of lítilHann segir Isavia hafa með þessu máli sýnt af sér vanhæfni sem og með því að bregðast ekki við raunvandanum, sem er stærð Leifsstöðvar og geta til að taka á móti ferðamönnum til landsins. „Ferðaiðnaðurinn hefur vaxið um 18% á ári á síðustu þremur árum. Samt er aukin afkastageta Leifsstöðvar aðeins eitt hlið fyrir næsta sumar og engin svör fást fyrir árið 2016. Við getum byggt hér upp endalaust af hótelum og alls kyns ferðaþjónustu en ef við komum ferðamönnunum ekki til landsins þá er sú vinna til lítils,“ segir Skúli.

Hann vill að byggð verði ný lággjaldaflugstöð á gamla varnarsvæðinu í Keflavík. „Þetta væri hraðari, einfaldari stöð, ekki með rana úti um allar trissur sem er rándýrt heldur byggja þetta upp með rútum. Það þarf ekki einu sinni að byggja nýjar flugbrautir heldur eru þær til á svæðinu sem er mjög vel til þessa fallið. Þetta tæki kannski einhver tvö til þrjú ár en það væri hægt að fjármagna þetta án aðkomu ríksins.“

Samkeppni af hinu góðaSkúli segir að þessi stærsta tekjulind þjóðarinnar hljóti að þurfa heilbrigða samkeppni eins og aðrar stoðgreinar. „Við erum með þrjá banka sem veita hver öðrum harða samkeppni, þrjú tryggingarfélög og það er mjög virk samkeppni í sjávarútvegi. Það er alltaf af hinu góða fyrir neytendur og langtímahagsmuni hvaða greinar sem er.“

Skúli segist finna fyrir pólitískum vilja frá einstökum ráðherrum en vandinn sé aðallega sá að svo margir ráðherrar komi að þessum málum. „Þó þau séu öll af vilja gerð þá er það flókið þegar svona margir kokkar eru í eldhúsinu.“

Búin að ávinna sér gott traustSkúli er þó bjartsýnn á framhaldið og hyggst komast til Ameríku vorið 2015. „Þetta hefur gengið vonum framar hjá okkur, árið 2012 vorum við með 90 þúsund farþega en þeir voru yfir 400 þúsund árið 2013. Við erum búin að ávinna okkur gott traust og finnum fyrir því, en auðvitað erum við mjög svekkt að geta ekki fylgt þessu eftir með þeirri stækkun sem hefði getað orðið,“ segir Skúli að lokum.