Norwegian fær tíma fyrir flug milli Keflavíkur og Kaupmannahafnar

Norska lággjaldaflugfélagið Norwegian hefur fengið úthlutaða afgreiðslutíma við Flugstöð Leifs Eiríkssonar fyrir tvær ferðir í viku á milli Keflavíkur og Kaupmannahafnar. Það er vefsíðan Túristi.is sem greinir frá.

Daniel Kirchhoff, talsmaður Norwegian í Danmörku, segir í samtali við Túrista að þrátt fyrir úthlutunina sé ekki víst að tímarnir verði nýttir. Verið sé að skoða möguleika á nýjum áfangastöðum um allan heim.

Í haust hafði Túristi.is eftir Bjørn Kjos, forstjóra félagsins, að honum þætti Ísland vera spennandi áfangastaður og að hann gæti hugsað sér að fljúga hingað til lands frá fleiri áfangastöðum.

Flugleiðin á milli Keflavíkur og Kaupmannahafnar er gríðarlega vinsæl á sumrin. Icelandair er með allt að 26 ferðir á viku á milli borganna og WOW Air býður upp á morgunflug alla daga. Þá er Primera Air einnig með stakar ferðir.