Svipmynd Markaðarins: Tóku kaffið með sér frá Gautaborg

Hjónin Sigmundur Dýrfjörð og Berglind Guðbrandsdóttir hafa rekið fyrirtækið Te og Kaffi frá árinu 1984. Þau opnuðu fyrstu verslunina í apríl það ár og nú þremur áratugum síðar hafa þau opnað sitt tíunda kaffihús.

„Áhuginn kviknaði þegar við versluðum í litlum te- og kaffibúðum í Gautaborg þar sem við bjuggum í kringum 1980. Þegar við komum heim þá var sú kaffimenning sem við kynntumst í Svíþjóð ekki til staðar hér á landi og við ákváðum því að opna verslun á Barónsstíg 18. Tveimur árum síðar opnuðum við síðan okkar fyrsta kaffihús,“ segir Sigmundur, spurður um hvernig það kom til að hann og Berglind ákváðu að hefja innflutning á kaffi.

Fyrirtæki þeirra er nú með um 130 starfsmenn í vinnu og þau kaupa kaffi frá hátt í þrjátíu löndum í þremur heimsálfum. Höfuðstöðvar Tes og Kaffis eru í Hafnarfirði þar sem hjónin hófu undirbúning að kaffiframleiðslu árið 1987.

„Við sóttumst strax eftir sérstökum tegundum af kaffi því hver tegund hefur sitt einkenni eftir því hvar hún vex í heiminum. Og við ristum og blöndum saman ákveðnum tegundum og þannig byggjum við upp kaffiblöndur út frá náttúrulegum sérkennum hverrar tegundar. Við vorum því töluvert á undan þessari kaffibyltingu og þegar við byrjuðum 1984 var ekki kaffihús á hverju horni eins og er í dag og espresso-vélar á hverju strái. En í dag fer maður ekki inn á veitingahús eða kaffihús þar sem ekki finnst espresso-vél.“

Sigmundur og Berglind ferðast og ganga mikið í frístundum sínum.

„Við höfum einnig gaman af útivist og eldamennsku og við í fjölskyldunni förum mikið í Borgarfjörðinn þar sem við eigum sumarbústað.“

Guðmundur Halldórsson, framkvæmdastjóri Te og Kaffi

„Ég þykist vita að þegar fyrirtækið var stofnað var engin skotheld viðskiptaáætlun eða Excel-útreikningar sem lágu þar til grundvallar.

Þau Berglind og Sigmundur hafa farið öll þessi ár á tilfinningunum og ástríða og umhyggja hafa stýrt þeirra verkum og það sýnir sig í öllu starfi fyrirtækisins. Þau eru stundum skemmtilega ósammála og algjörlega á öndverðum meiði, til dæmis varðandi ýmsa þætti sem tengjast rekstrinum, og þá er hægt að taka rökræður við þau um alla skapaði hluti, daginn út og inn, án þess að það lendi nokkurn tímann í einhverjum leiðindum. Menn komast alltaf að niðurstöðu sem allir geta verið sáttir um.“

Guðrún Birna Eiríksdóttir, vinkona

„Ég var fyrsti starfsmaðurinn hjá Berglindi og Simma, sumarið 1984, þegar þau opnuðu á Barónsstígnum. Í þessari litlu búð var loksins hægt að fá gott kaffi og te á Íslandi. Þau hafa kennt Íslendingum að þekkja muninn á góðu kaffi og vondu.

Þeim finnst svo gaman í vinnunni að þó ég reyni að segja þeim að leika sér fyrir gróðann þá setja þau hann beint í fyrirtækið og halda áfram að byggja upp. Þau eru af gamla skólanum, dugleg og heiðarleg í viðskiptum.“