Brenna sig á einföldu atriði í viðtali

„Það er alltaf jafnleiðinlegt þegar reynslumiklir og hæfir atvinnuleitendur brenna sig á jafneinföldu atriði og að geta ekki sagt frá eigin reynslu og verkefnum á skýran og greinargóðan hátt. Þetta bitnar á framsögunni og í starfi mínu við ráðningar hef ég séð þetta koma of oft fyrir,“ segir Erik Christianson Chaillot, ráðgjafi á ráðningasviði Capacent.

Hann segir að skiljanlega geti oft verið erfitt að rifja upp atriði langt aftur í tímann en einmitt þess vegna sé undirbúningurinn mikilvægur.

„Gera má ráð fyrir að sá sem tekur viðtalið hafi skoðað gögn atvinnuleitandans. Ferilskráin segir samt sem áður takmarkaða sögu. Merking starfstitils fer eftir því við hvað atvinnuleitandinn hefur starfað. Til þess að koma sér almennilega á framfæri verða menn að kunna ferilskrána sína utan að og geta sagt söguna á bak við hana.“

Erik segir það algjört lykilatriði í atvinnuviðtali að nefna hvaða verkefnum hafi verið unnið að og hvar, hvert umfang verkefnanna hafi verið, hvaða breytingar hafi orðið vegna frumkvæðis viðkomandi, hvaða áskorunum hann hafi staðið frammi fyrir og hvernig hann hafi tekist á við þær. „Slíkar upplýsingar eru líklegar til að vekja athygli viðmælandans, ekki síst ef reynslan tengist þeirri ábyrgð og verkefnum sem mögulegt framtíðarstarf felur í sér. Það er ekki nóg að segja ég var bara í alls konar verkefnum eða sem stjórnandi kom ég eiginlega að öllu.“

Algengt er að atvinnuleitendur séu taugaóstyrkir fyrir atvinnuviðtal, að því er Erik greinir frá. „Góður undirbúningur eykur líkurnar á sjálfsöryggi og vellíðan í atvinnuviðtali. Hann minnkar einnig líkur á því að viðkomandi fái óvæntar spurningar.“

Að kynna sér fyrirtækið sem sótt er um starf hjá og starfið sjálft er einnig mikilvægt. „Það er gott að semja spurningar fyrir fram til að sýna áhuga og undirbúa svör við algengum spurningum, t.d. um eigin styrkleika og veikleika. Þar að auki er vert að benda á nauðsyn þess að vera snyrtilega klæddur,“ tekur Erik fram.