IÁ hönnun ehf. kaupir 80% hlut í 3X Technology

Samkomulag hefur verið gert um kaup IÁ hönnunar ehf. á 80% hlut í 3X Technology á Ísafirði. IÁ hönnun ehf. er félag í eigu Ingólfs Árnasonar, framkvæmdastjóra Skagans hf. og Þorgeirs & Ellerts hf. á Akranesi. Kaupin eru háð samþykki Samkeppnisstofnunar.

Í yfirlýsingu frá IÁ hönnun segir að fyrirtækin hafi sérhæft sig í vinnslutengdum kælilausnum og átt í margháttuðu samstarfi á undanförnum árum. Sameiginlega sérhæfa fyrirtækin sig í vinnslukerfum fyrir rækju, bolfisk og uppsjávartegundir og öðrum matvælaiðnaði. Vinnslulausnir frá fyrirtækjunum hafa verið notaðar víða um heim með framúrskarandi árangri.

Með aukinni samvinnu, sem fyrirhuguð er í kjölfar samkomulagsins, gefst möguleiki á að samþætta markaðs-, vinnslu- innkaupa- og þróunarvinnu fyrirtækjanna. Mikil sérþekking er fyrir hendi jafnt á Akranesi sem og á Ísafirði. Hún verður áfram nýtt á hvorum stað um sig til markaðssóknar, meðal annars til að jafna sölusveiflur og til að efla heildarrekstur fyrirtækjanna enn frekar. Fjárhagsleg staða fyrirtækjanna í dag er mjög sterk.