Gunnar: Hjónabandið hvati til árása

Gunnar í Krossinum sagði fyrir Héraðsdómi Reykjavíkur að hjónaband hans og Jónínu Benediktsdóttur væri grunnurinn að því að nokkrar konur hafi sakað hann um kynferðisofbeldi. Mbl greinir frá þessu.

Pressan.is hafi síðan greint frá þessum ásökunum „til að ná ákveðnum markmiðum gagnvart Jónínu,“ hefur Mbl eftir Gunnari.

Aðalmeðferð í meiðyrðamáli Gunnars sem hann höfðaði gegn Vefpressunni og Steingrími Sævarr Ólafsyni, þáverandi ritstjóra Pressunnar, auk þeim Ástu Sigríði H. Knútsdóttur og Sesselju Engilráð Barðdal fer fram í dag. Gunnar krefst þess að fá fimm milljónir króna í bætur frá hverjum aðila fyrir sig vegna ásakana um kynferðisbrot.

Aðalmeðferðin stendur nú yfir og greindi Vísir frá því í morgun að færri hefðu komist að en vildu í stærsta sal Héraðsdóms Reykjavíkur til að fylgjast með málinu.

Gunnar sagði í dag að málið hefði verið unnið bæði innan trúfélagsins Catch the Fire og á ritstjórn Pressunnar. Hann sagði trúfélagið hafa ætlað að nota þetta mál til að fá brautargengi með það sem þau eru að gera og hafi reynt að safna saman hópi fólks til að fara með ásakanir á hendur honum og hann þannig settur í þá stöðu að geta ekki með neinum hætti varið sig.

Þannig hafi sú fyrsta sem bar hann sökum verið lyft hærra innan þessa trúfélags eftir því sem ásakanir hennar urðu grófari. Fyrir rest hafi hún síðan verið komin í guðtölu innan félagsins. Síðan hafi orðið mikil viðhorfsbreyting hjá konunni eftir að Gunnar gekk í hjónaband með Jónínu. Konan hafi sagt í lögregluskýrslu að hún hafi fyllst svo mikilli reiði að hún réði ekki við hana.

Gunnar sagði einnig að útgáfa Jónínu Benediktsdóttur á ævisögu sinni hafi verið hvati Pressunnar til árása, þar sem eigendur Pressunnar hafi verið settir í mjög alvarlegt ljós.

Ein kvennanna í trúfélaginu hafi síðan starfað hjá Vefpressunni og miðillinn því þurft að ná fram ákveðnum markmiðum gagnvart Jónínu og notað þetta mál til þess.