Applicon í samstarf við hugbúnaðarrisa

Applicon hefur hafið samstarf við upplýsingatæknifyrirtækið CGI og þýska hugbúnaðarrisann SAP um lausn í skýinu fyrir banka.

Lausnin er nú þegar komin í notkun á sænskum bankamarkaði en stefnt er að því að bjóða hana víðar á Norðurlöndum.

CGI er stærsta upplýsingatæknifyrirtæki Svíþjóðar og fimmta stærsta upplýsingafyrirtæki heims með 68 þúsund starfsmenn og starfsemi í 40 löndum.

Applicon verður með ráðstefnu fyrir fjármálafyrirtæki í fyrramálið þar sem meðal annars verður fjallað um skýlausnir fyrir banka.

CGI Cloud Banking er heildstæð lausn með alla meginvirkni fyrir bankastarfsemi og er tengd norrænum greiðslukerfum.

Applicon hefur aðlagað lausnina að kröfum norrænna banka og því geta bankar með almenna bankaþjónustu tengst skýinu með einföldum hætti.

Meðal helstu hluta sem lausnin býr yfir eru inn- og útlánakerfi, veðumsjónarkerfi, greiðslumiðlun, fjárhagskerfi og netbankalausn.

„Upplýsingakerfi margra banka eru komin til ára sinna og aðlögðun á kerfum getur reynst dýr og tímafrek. Við sjáum breytingar á markaðnum þar sem meiri kröfur eru gerðar til notendavænna og sveigjanlegra lausna. Með CGI Cloud Banking er hægt að skipta út gömlum innviðum og bjóða í framhaldi enn betri þjónustu til viðskiptavina," segir Ingimar G. Bjarnason, framkvæmdastjóri Applicon, á Íslandi.

Applicon er hugbúnaðarfyrirtæki með starfsemi á Íslandi og Svíþjóð og er hluti af Nýherjasamstæðunni.