VÍS semur um kaup og innleiðingu tryggingakerfa

VÍS hefur ákveðið að semja við danska hugbúnaðarframleiðandann TIA Technology A/S um kaup og innleiðingu á staðlaðri heildarlausn fyrir tryggingafélög en þetta kemur fram í fréttatilkynningu frá VÍS.

Stefnt að því að ljúka innleiðingunni innan eins árs. Ákvörðunin um að ganga til samninga við TIA er tekin eftir ítarlega greiningu á möguleikum kerfisins til að styðja við rekstur félagsins.

Tryggingakerfin sem um ræðir eru staðlaðar iðgjalda- og tjónalausnir sem eru í notkun hjá fjölda stórra tryggingafélaga víða um heim.

Gert er ráð fyrir að fjárfestingin byrji að skila ávinningi um það bil ári eftir að innleiðingu lýkur og hafi óveruleg áhrif á afkomu félagsins á innleiðingartíma.

„Stefna VÍS er að bæta þjónustu við viðskiptavini og auka ánægju þeirra. Hluti af því er að auðvelda þeim að eiga viðskipti við félagið,“ segir Sigrún Ragna Ólafsdóttir, forstjóri VÍS.

„Með TIA byggjum við sterkan grunn til framtíðar, njótum framþróunar á kerfinu með stórum hópi annarra notenda og getum einbeitt okkur enn betur að því að þjóna viðskiptavinum okkar með skilvirkum hætti.“

Sigrún segir að lausnir TIA séu þrautreyndar og í notkun hjá mörgum tryggingafélögum erlendis sem við horfum til.

„Með því að staðla uppsetninguna náum við að einfalda starfsemi okkar og leggja áherslu á virðisaukandi þjónustu til viðskiptavina okkar.“