Opin kerfi fær öryggisvottun

Opin kerfi hf. hefur hlotið vottun frá breska staðlafyrirtækinu The British Standards Institution og nær vottunin yfir heildarhýsingarþjónustu fyrirtækisins í gagnaveri Verne Global og þjónustu við alla samningsbundna viðskiptavini sem útvista rekstri tölvu- og upplýsingakerfa til Opinna kerfa. Þetta kemur fram í tilkynningu frá Opnum kerfum.

Vinna við innleiðingu vottunarinnar hefur staðið yfir frá árinu 2010. Að undirbúningi innleiðingar komu sérfræðingar Opinna kerfa, stjórnendur og starfsmenn ásamt því sem fengin var aðstoð frá ráðgjafafyrirtækinu Admon ehf.

Að sögn Gunnars Guðjónssonar forstjóra Opinna kerfa er vottunin fyrirtækinu afar mikilvæg því með henni staðfesti utanaðkomandi fagaðili gæði verkferla sem unnið er eftir hjá fyrirtækinu til að tryggja rétta og örugga meðhöndlun við vörslu gagna og stöðuga þjónustu við viðskiptavini.

„Þetta hefur verið skemmtilegt og krefjandi ferli í tæp fjögur ár með aðkomu fjölmargra aðila en það má segja að það sem einkenndi ferlið allan tímann var það grundvallarmarkmið okkar að einfalda verklag með skotheldum ferlum sem á endanum stuðlar að öruggari rekstri hjá viðskiptavinum okkar,“ segir Gunnar.

Opin kerfi segir gagnaver Verne Global stærsta og tæknilega fullkomnasta gagnaver landsins og þar sé fjölbreyttur hópur innlendra og erlendra viðskiptavina sem kaupa vörur og sérfræðiþjónustu af Opnum kerfum. Þeirra á meðal eru BMW, Umhverfisstofnun Sameinuðu þjóðanna, fjarskiptafélagið City of London Telecom, Farice og fleiri.

Að sögn Gunnars er stöðugur vöxtur í þjónustu við slík fyrirtæki og stofnanir. „Það á bæði við um fjölda fyrirtækja og einnig umfang þjónustunnar við hvern og einn viðskiptavin. Allir gera þessir viðskiptavinir strangar kröfur um fagleg vinnubrögð og því er geysimikilvægt fyrir þjónustuaðila eins og Opin kerfi að samþætta sín faglegu vinnubrögð við þá staðla sem Verne Global gagnverið vinnur eftir, svo og að mæta þeim gæðakröfum sem viðskiptavinir gagnaversins gera.“

Gunnar segir enn fremur að ráðandi þáttur í ákvörðun viðskiptavina, sem úthýsa rekstri tölvu- og upplýsingakerfa og ekki síst hýsingu trúnaðargagna, sé traust orðspor fyrirtækisins á þessu sviði, en misbrestur á því getur haft margvíslegar og erfiðar afleiðingar. „Þessi vottun er staðfesting á gæðum þjónustu Opinna kerfa og sé tekið tillit til kjarnafærni þess landsliðs sérfræðinga sem starfar hjá félaginu þá er ljóst að Opin kerfi hafi verulega styrkt stöðu sína sem besti valkostur þegar kemur að rekstri og útvistun á tölvu- og upplýsingakerfum.“