Aðstoðarframkvæmdastjóri Viðskiptaráðs lætur af störfum

Haraldur I. Birgisson, aðstoðarframkvæmdastjóri Viðskiptaráðs, er hættur hjá ráðinu. Hann mun þó verða starfsfólki og stjórn Viðskiptaráðs innan handar eftir þörfum næstu vikur og mánuði. Frá þessu greinir á heimasíðu Viðskiptaráðs.

Haraldur mun hefja störf á skatta- og lögfræðisviði Deloitte næstkomandi mánudag.

Haraldur segist fullur tilhlökkunar að slást í hóp afar öflugs teymis hjá Deloitee en á sama tíma kveðji hans samstarfsfólk sitt hjá Viðskiptaráði með söknuði. „Það hafa verið forréttindi að fá að starfa með svona færum hópi einstaklinga og um leið njóta viðamikils baklands öflugra stjórnarmanna og félagsmanna. Ég óska þeim velfarnaðar og vona að leiðir okkar muni reglulega liggja saman. Þá hlakka ég til að fylgjast með áframhaldandi vexti Viðskiptaráðs, en eins og nýafstaðið Viðskiptaþing endurspeglar ágætlega þá er málefnastaða ráðsins sterk,“ segir hann.

Frosti Ólafsson framkvæmdastjóri Viðskiptaráðs segir framlag Haraldar til starfsemi Viðskiptaráðs á undanförnum sjö árum hafa verið ómetanlegt. „Auk þess að sinna þeim verkefnum sem falla undir svið aðstoðarframkvæmdastjóra og lögfræðings hefur Haraldur meðal annars leitt uppbyggingu Norðurslóða-viðskiptaráðsins og gegnt lykilhlutverki í sameiginlegri útgáfu Viðskiptaráðs, SA og Nasdaq OMX Iceland á leiðbeiningum um stjórnarhætti fyrirtækja og tengdum verkefnum. Stjórn og starfsfólk ráðsins þakka Haraldi fyrir vel unnin störf í þágu ráðsins og óska honum um leið velfarnaðar í nýju og spennandi verkefni,“ segir Frosti

Haraldur hóf störf hjá Viðskiptaráði í mars 2007, fyrst sem lögfræðingur og síðar aðallögfræðingur. Hann tók við stöðu aðstoðarframkvæmdastjóra í ágúst 2010, auk þess að sinna tímabundið starfi framkvæmdastjóra eftir að Finnur Oddsson lét af störfum í nóvember 2012 og þar til Frosti Ólafsson tók við í júní 2013. Haraldur er lögfræðingur frá Háskólanum í Reykjavík og aflaði sér lögmannsréttinda árið 2011.