Engar viðræður við kröfuhafa

Engar samningaviðræður eru í gangi milli íslenskra stjórnvalda og erlendra kröfuhafa. Þetta segir Sigmundur Davíð Gunnlaugsson forsætisráðherra í viðtali við Bloomberg. Stjórnvöld ætla sér ekki að standa í slíkum viðræðum.

Sigmundur segir í viðtalinu að stjórnvöld eigi ekki að greiða götu kröfuhafa bankanna, þeir séu fjárfestar, vogunarsjóðir, sem keyptu kröfur bankanna á lágu verði og veðjuðu á að ná fjármunum hratt til baka.

Hann segir virðast sem kröfuhafarnir bíði þess að íslensk stjórnvöld myndu stíga inn í ferlið en það muni ekki gerast og segir það ekki í verkahring stjórnvalda að semja upp uppgjör föllnu bankanna. Stjórnvöld muni meta hvort þær lausnir sem slitastjórnir leggja til geri það kleift að aflétta gjaldeyrishöftunum.

Sigmundur segir að uppgjör bankanna snúist um að einkaaðilar nái samkomulagi um skuld á vegum einkaaðila. Þannig komi ferlið ríkisvaldinu ekki við, ekki sé um að ræða opinberar skuldir. Ríkisstjórnin eigi ekki að koma að viðræðunum að öðru leyti en því að tryggja fjárhagslegan stöðugleika hér á landi.