Afkoma MP banka neikvæð um 159 milljónir

Afkoma MP banka fyrstu sex mánuði ársins var neikvæð um 159 milljónir króna eftir skatta sem er bætt afkoma samanborið við seinni hluta árs 2013 en þá nam tap bankans tæpum milljarði. Þetta kemur fram í tilkynningu frá MP-banka.

Þar kemur fram að afkoman á fyrri hluta árs 2014 litast af gjaldfærðum kostnaði vegna hagræðingaraðgerða sem nam um 100 milljónum króna. Þá var gengistap bankans um 50 milljónir króna á tímabilinu.

Eigið fé bankans í lok júní 2014 nam 4.847 milljónum króna. Eiginfjárhlutfall bankans hefur styrkst á fyrstu sex mánuðum ársins og var 15,1% í lok júní samanborið við 14,2% í árslok 2013.

Hreinar vaxtatekjur námu 674 milljónum króna og drógust saman um 12% miðað við seinni hluta árs 2013 að teknu tilliti til vaxtaleiðréttingar. Í tilkynningunni segir að ástæðan sé minnkun útlánasafns.

Vaxtamunur, reiknaður sem hlutfall af meðalstöðu heildareigna í upphafi og lok uppgjörstímabilsins var 2,4% sem er 0,2 prósentustigum lægra en á sama tímabili í fyrra. Útlán til viðskiptavina námu rúmum 23 milljörðum króna. Hlutfall 90 daga vanskila af útlánum í lok tímabils að teknu tilliti til sértækrar niðurfærslu nam 2,2%. Hlutfall áhættuveginna eigna af heildareignum var um 49% í lok tímabils.

Þóknanatekjur námu 814 milljónum króna og jukust þær um 10% frá seinni hluta 2013 að teknu tilliti til árangurstengdra þóknana. Jákvæð þróun hefur verið í þóknanatekjum það sem af er ári og endurspeglast hún meðal annars í góðum árangri í fyrirtækjaráðgjöf og eignastýringu. Mikill vöxtur hefur verið hjá fyrirtækjaráðgjöf bankans og aukning eigna í stýringu hefur skilað auknum föstum þóknanatekjum.

„Það má vel skipta þessu uppgjöri, og í raun starfsemi bankans á tímabilinu, í tvennt. Fyrri áætlunum sem miðuðu við aðgang að vaxtarfjármagni þurfti nauðsynlega að breyta þegar þær forsendur stóðust ekki. Það kom harðast niður á bankastarfseminni sem krefst mests eigin fjár,“ segir Sigurður Atli Jónsson, forstjóri MP banka.

Sigurður segir að þess vegna hafi þurft að stokka spilin uppá nýtt og endurskipuleggja rekstur.

„Verulegur árangur náðist í þeirri endurskipulagningu þótt þar sé um krefjandi aðgerðir að ræða eins og fækkun stöðugilda um 30% ber vitni um. Salan á Lykli var hluti af þeirri endurskipulagningu, en hún gekk mjög vel fyrir sig. Kostnaður við hagræðingu nemur um 100 milljónum króna á fyrri hluta ársins. Kostnaðargrunnur bankans hefur hins vegar verið lækkaður verulega og mun það koma fram í bættri grunnafkomu eftirleiðis.“