Íslandsbanki hagnaðist um 23,1 milljarð króna í fyrra

Íslandsbanki hagnaðist um 23,1 milljarð króna á árinu 2013 samkvæmt uppgjöri sem birt var í morgun. Hagnaður á lokafjórðungi ársins var 7,7 milljarðar.

Afkoman er rétt undir afkomu fyrra árs, en árið 2012 nam hagnaður bankans 23,4 milljörðum.

„Arðsemi eigin fjár eftir skatta var 14,7 prósent á árinu samanborið við 17,2 prósent árið 2012,“ segir í tilkynningunni. Minni arðsemi er fyrst og fremst sögð skýrast af hækkun eigin fjár sem nemi 14,4 prósentum milli ára.

„Skattar og gjöld greidd til ríkis og stofnana námu samtals 12,4 milljörðum króna á árinu, samanborið við 9,2 milljarða króna 2012, sem er hækkun um 34 prósent á milli ára.“

Þá kemur fram í tilkynningunni að frá stofnun bankans hafi um 35.500 einstaklingar og um 4.100 fyrirtæki fengið afskriftir, eftirgjafir eða leiðréttingar á skuldum sem nemi um 548 millljörðum króna.

Endurskipulagning er einnig sögð ganga vel, hlutfall lána í endurskipulagningu hafi verið átta prósent í lok árs, en var ári fyrr 14 prósent. Þá hafi hlutfall lána í meira en 90 daga vanskilum verið fjögur prósent, miðað við átta prósent í desember 2012.

Heildareignir bankans jukust um 5,2 prósent á árinu 2013, fóru úr 823 milljörðum króna í 866 milljarða.

Í tilkynningu bankans er haft eftir Birnu Einarsdóttur, bankastjóri Íslandsbanka, að árið 2013 hafi verið gott ár hjá bankanum. „Og má segja að við höfum uppskorið árangur þeirra miklu og góðu vinnu sem starfsmenn á öllum sviðum bankans hafa lagt af mörkum á undanförnum árum.,“ er eftir henni haft.

Auknar álögur á bankann dragi hins vegar úr hagnaði. Birna bendir á að greiddur hafi verið bankaskattur upp á 2,3 milljarða króna á árinu.

„Við sjáum aukin umsvif í atvinnulífinu en ný útlán á árinu 2013 námu um eitthundrað milljörðum króna og allt bendir til að fyrirtæki og einstaklingar hafi meira svigrúm til fjárfestinga en áður,“ segir Birna jafnframt í tilkynningu bankans.

„Við höfum lagt áherslu á aukningu þóknanatekna sem skilaði sér í 10 prósenta aukningu þóknanatekna á milli ára en þær námu 10,4 milljörðum samanborið við 9,5 milljarða árið 2012.“ Þá hafi Íslandsbanki verið fremstur í miðlun hlutabréfa á árinu og sé leiðandi í skráningu hlutafélaga á markað.

„Góð framvinda hefur verið í hagræðingarverkefnum innan bankans en hins vegar litast uppgjörið af einskiptisliðum, bæði í tekjum og kostnaði.“

Birna segir mikla áherslu hafa verið lagða á að fjölga stoðum í fjármögnun bankans með góðum árangri. „Aðgengi að erlendum fjármagnsmörkuðum gerir okkur betur í stakk búin til að styðja við viðskiptavini okkar sem stunda alþjóðleg viðskipti og þarfnast fjármögnunar í erlendri mynt.“