Klettur vill tryggja fjölskyldum langtímaleigu

Húsnæði Íbúðalánasjóður hefur selt 517 íbúðir til Leigufélagsins Kletts ehf., sem sjóðurinn stofnaði fyrir ári, en rekstur þess er sjálfstæður. Rúmur helmingur íbúðanna er á höfuðborgarsvæðinu og á Suðurnesjum.

„Við erum félag sem hefur það hlutverk að bjóða einstaklingum og fjölskyldum trygga leigu með áherslu á langtímahugsun. Leigjandinn getur gert ráð fyrir að hafa viðkomandi húsnæði til afnota til lengri tíma en áður hefur þekkst enda tjöldum við ekki til einnar nætur,“ segir Bjarni Þór Þórólfsson, framkvæmdastjóri Kletts.

Sótt er um íbúðirnar á heimasíðu Kletts og leigumiðlunarsíðum. Ef fleiri en einn sækir um íbúð er dregið úr öllum umsóknum sem borist hafa í eignina. „Flestar þessara 517 íbúða eru nú þegar í útleigu. Það er þó alltaf einhver hreyfing.“

Almennt eru gerðir ótímabundnir leigusamningar með sex mánaða uppsagnarfresti. Spurður um leiguverð segir Bjarni að notast sé við hugtakið sanngjörn markaðsleiga við ákvörðun á leiguverði. Sem dæmi auglýsir félagið 41 fermetra íbúð í Fannborg í Kópavogi á 83 þúsund krónur.

Bjarni getur ekki svarað hvort eða hvenær fleiri íbúðir komi á skrá leigufélagsins en samkvæmt mánaðarskýrslu Íbúðalánasjóðs átti sjóðurinn 2.117 fullnustueignir í lok janúarmánaðar 2014, fyrir utan íbúðir sem seldar voru til Kletts.