Innanríkisráðherra skrifaði undir með farsíma

Hanna Birna Kristjánsdóttir, innanríkisráðherra, undirritaði í dag skjal með farsíma á stærstu farsímaráðstefnu í heimi.

Undirritunin fór í gegnum íslenska hugbúnaðinn CoreData. Ráðstefnan sem haldin er í Barcelona ár hvert er vel sótt og eru um 1.700 sýningaraðilar á ráðstefnunni og um 80.000 gestir.

Á ráðstefnunni kynnti íslenska hugbúnaðarfyrirtækið Azazo (Gagnavarslan) hugbúnaðinn CoreData - „BoardMeetings“ og rafræna undirritun með notkun farsíma og/eða spjaldtölvu.

Útfærslan sem Azazo hefur þróað hefur hlotið mikla athygli erlendis, svo mikla að fyrirtækinu var boðið, af alþjóðlegu fjarskiptasamtökunum GSMA, að kynna hugbúnaðinn á aðalbás ráðstefnunnar. Azazo er fyrsta hugbúnaðarfyrirtækið á Íslandi sem styður rafrænar undirritanir skjala með notkun farsíma. Azazo hefur unnið að þessari lausn í nánu samstarfi við Auðkenni á Íslandi og Valimo í Finnlandi sem er í eigu Gemalto, sem er gríðarlega öflugt meðal annars í framleiðslu á farsímakortum.

Azazo er þekkingar- og hugbúnaðarfyrirtæki sem býður heildarlausnir í stjórnun upplýsinga, meðhöndlun og varðveislu þeirra. Azazo býður ráðgjöf sérfræðinga m.a. á sviði upplýsinga- og skjalastjórnunar auk verkefna- og gæðastjórnunar.

Fyrirtækið er í fararbroddi í upplýsingatækni og hefur þróað hugbúnaðinn CoreData ECM sem auðveldar fyrirtækjum að halda utan um upplýsingar á skipulagðan og öruggan máta. Azazo veitir einnig viðtæka þjónustu við skönnun, skráningu og prentun auk vörslu skjala, muna og listaverka í sérhæfðu vörsluhúsnæði.