Byggja tíu þúsund tonna frystigeymslu í Hafnarfirði

Eimskip hefur ákveðið ráðast í byggingu á fullkominni tíu þúsund tonna frystigeymslu á athafnasvæði sínu í Hafnarfirði. Í tilkynningu frá fyrirtækinu segir að ákvörðunin hafi verið tekin í ljósi þess að veruleg aukning hafi orðið í veiðum og vinnslu á uppsjávarfiski sem kalli á vaxandi frystigeymsluþjónustu.

Þar að auki sé aukin eftirspurn eftir vöruhótelþjónustu fyrir frystar neyendavörur.

Fyrir rekur Eimskip frystigeymsluna Fjarðarfrost sem rúmar um þrjú þúsund tonn, ásamt því að vera með ufangsmikla löndunarþjónustu fyrir sjávarútveginn auk tengdrar hliðarþjónustu. Eimskip hefur verið með starfsemi í Hafnarfirði frá árinu 1970.

„Markmið félagsins er að byggja upp öfluga þjónustumiðstöð fyrir sjávarútveginn staðsetta í Hafnarfirði. Hafnarfjarðarhöfn er vel staðsett og býður upp á góða aðstöðu fyrir útgerðir,“ segir í tilkynningunni.

Áætlað er að framkvæmdir hefjist fyrir áramót og að fyrsti áfangi frystigeymslunnar verði tilbúinn til notkunar í sumar. Mögulegt verður að stækka geymsluna í áföngum um allt að 14 þúsund tonn í samræmi við þarfir viðskiptavina.

„Með þessari ákvörðun er Eimskip að fylgja eftir þeirri þróun sem verið hefur til að geta þjónustað viðskiptavini sína enn betur en áður, enda er sjávarútvegurinn ein af grunnstoðum íslensks efnahagslífs og þjónusta við sjávarútveginn er mikilvæg stoð í rekstri félagsins.“