8,2 milljarðar af bankaskatti renna til Íbúðalánasjóðs

8,2 milljarðar renna til Íbúðalánasjóðs til að mæta kostnaði vegna hraðari uppgreiðslu lána og öðrum ófyrirséðum kostnaði sem af skuldaleiðréttingu ríkisstjórnarinnar gæti hlotist. Frá þessu greinir í Peningamálum Seðlabankans.

Áætlað er að sá hluti bankaskattsins sem eyrnamerktur er skuldalækkuninni nemi 23 milljarða króna á ári eða samtals 92 milljarðar yfir fjögurra ára tímabil.

Þar af fara 20 milljarðar á ári eða samtals 80 milljarðar til að fjármagna lækkun skulda sem skiptist í 72 milljarða til lækkunar höfuðstóls verðtryggðra lána og 8 milljarða vegna áfallinna vaxta og verðbóta, uppgreiðsluákvæða skuldabréfa og mismunar markaðs- og nafnvirðis lánanna.

Afganginn eða 3 milljarða króna á ári eða 12 milljarða á fjórum árum á að nota til að tryggja fulla fjármögnun aðgerðarinnar. Þar af eru 1,8 milljarðar króna til að mæta áætluðu tekjutapi ríkissjóðs vegna hækkunar framlags í séreignarlífeyrissparnað úr 2% í 4% á þessu ári og 2 milljarða króna vegna almenns kostnaðar við framkvæmd aðgerðarinnar.

Seðlabankinn áætlar að tekjur af bankaskattinum sjálfum verði hins vegar meiri eða 38,5 milljarðar króna á ári, 154 milljarðar á fjögurra ára tímabili. Þeir 62 milljarðar króna umfram þá 92 milljarða króna sem tengjast skuldaaðgerðinni eru hluti af almennri tekjuöflun ríkissjóðs.

Gert er ráð fyrir að 36 milljarðar króna af 154 milljarða bankaskattinum komi frá starfandi fjármálafyrirtækjum en að lunginn af fjárhæðinni eða 118 milljarðar króna komi frá búum fallinna fjármálafyrirtækja.