Gefa út leiðarvísi ferðaþjónustu

Lögmannsstofan Lex hefur gefið út 70 blaðsíðna leiðarvísi fyrir ferðaþjónustuna þar sem er að finna yfirlit yfir þau lögfræðilegu atriði sem ber að huga að við stofnun og rekstur ferðaþjónustufyrirtækja.

„Ég hef sjálfur mikinn ferðaþjónustuáhuga og fór í leiðsöguskólann og kynntist þar innviðum ferðabransans. Mér fannst svo margt lögfræðilega áhugavert sem þessi ört stækkandi atvinnugrein er að berjast við að ég stakk upp á því við Lex að við myndum búa til svona rit, ég ásamt sérfræðingum á hverju sviði, sem við síðan gerðum,“ segir Helgi Jóhannesson hæstaréttarlögmaður og eigandi Lex.

Í leiðarvísinum er farið ítarlega yfir ýmis atriði eins og stofnun einkahlutafélaga, samningagerð, ábyrgð, skattamál, samskipti við yfirvöld, tryggingamál og fleira.

Helgi segir ritið nýtast bæði stærri ferðaþjónustuaðilum sem minni og síðan er í ritinu ekki síður að finna atriði sem aðilar í almennum rekstri ættu að huga að.

„Þetta eru atriði til umhugsunar en ekki einhverjar heildarlausnir sem finna má í þessu riti og menn gætu jafnvel þurft að leita sér aðstoðar með.“

Ritinu hefur verið dreift gjaldfrjálst til ferðaþjónustufyrirtækja og Helgi segir viðtökurnar góðar. „Ég er búinn að fá kveðjur með þakklæti fyrir þetta og þessu er mjög vel tekið.“