Gengislán gerði út um áhugamál Jóhanns og Hilmis Snæs

Félag í eigu leikaranna Hilmis Snæs Guðnasonar og Jóhanns Sigurðarsonar var tekið til gjaldþrotaskipta um mánaðarmótin síðastliðin. Félagið, sem kallaðist Tölt ehf og var stofnað í kringum hestamennsku – áhugamál félaganna – árið 1999, var úrskurðað gjaldþrota árið 2010. Þrotabúinu var ekki skipt upp fyrr en um mánaðarmótin síðustu vegna þess að bifreið í eigu þrotabúsins fannst ekki og var ákveðið að finna bílinn áður en því yrði skipt upp.

Bíllinn fannst nýverið og reyndist eldgamall og var afskrifaður.

Frá þessu er sagt í Viðskiptablaðinu.

Leikararnir keyptu jörð á Suðurlandi stuttu eftir að félag þeirra var stofnað, og tóku fyrir því lán frá Kaupþingi í erlendri mynt. Þegar gengi íslensku krónunnar féll jukust skuldir félagsins til muna. Samkvæmt síðasta ársreikningi Tölts námu skuldir félagsins um 87 milljóniir. Lýstar kröfur í þrotabúið voru aftur á móti 168,4 milljónir króna.