Hagnaður Marel dróst saman um rúm 40 prósent

Marel birti afkomutölur ársins 2013 á heimasíðu sinni í gær. Tekjur fyrirtækisins drógust saman um 7,3 prósent og námu 661,5 milljónum evra samanborið við 714 milljónir árið 2012. Þá var hagnaður 2013 20,6 milljónir evra sem er lækkun um rúm 42 prósent á milli ára.

Handbært fé frá rekstri fyrir fjármagnsliði og skatta var 80,3 milljónir evra 2013 og 65,6 milljónir 2012. Þá voru nettó vaxtaberandi skuldir í lok árs 217,1 milljón evra en 243,2 milljónir 2012.

Í tilkynningu Marel segir að tekjur af stórum verkefnum hafi verið lágar, en tekjur af varahlutum og þjónustu hafi haldið áfram að vaxa. „Marel gerir ráð fyrir að leiðréttur rekstrarhagnaður (e. adjusted EBIT) árið 2014 muni nema 55 milljónum. Langtímahorfur eru góðar og Marel stefnir á að vaxa hraðar en markaðurinn.“

Áætlun með skýrari rekstaráherslum hefur nú verið hleypt af stokkunum með einföldun skipulags félagsins að markmiði og aukinni þjónustu við viðskiptavini. „Einingar sem þjónusta sömu viðskiptavini og styðjast við samskonar tækni munu verða samþættaðar. Á sama tíma er aukin áhersla lögð á virðisaukningu í stað stærðar með það að markmiði að rekstrarhagnaður Marel árið 2017 verði yfir 100 milljónir.“

Árni Oddur Þórðarson, forstjóri Marel, segir í tilkynningunni að staða Marel sé sterk. Fyrirtækið hafi vaxið um 4 prósent á ári að meðaltali, undan farin fimm ár. Þrátt fyrir að hagvöxtur á heimsvísu hafi verið í sögulegu lágmarki.

„Staða Marel, sem leiðtoga í þróun og framleiðslu á háþróuðum búnaði og kerfum til vinnslu á fiski, kjöti og kjúklingi er sterk í öllum heimsálfum. Marel hefur vaxið að meðaltali um 4% á ári undanfarin fimm ár á sama tíma og hagvöxtur á heimsvísu hefur verið í sögulegu lágmarki. Undanfarin ár hafa verið erfið fyrir matvælaframleiðendur sem hafa gengið í gegnum miklar hækkanir á bæði korn- og orkuverði. Markaðsaðstæður fara batnandi og á síðasta ári högnuðust matvælaframleiðendur og fjárhagssaða þeirra styrktist. Þörf framleiðenda er að aukast eftir endurnýjun og stækkun.

Marel skilaði 43 milljóna rekstrarhagnaði á síðasta ári sem er ekki í samræmi við samkeppnisstöðu og getu félagsins. Í kjölfar nýlegra breytinga á framkvæmdastjórn Marel höfum við tekið skref í þá átt að einfalda skipulag félagsins og lækka fastan kostnað. Nýlegar breytingar á skipulagi Marel í kjötiðnaði eru gott dæmi um breytingar til einföldunar þar sem þrjár einingar voru sameinaðar til að nýta betur nýsköpunar- og sölustarfsemi sem nú þegar er þar er til staðar innan félagsins. Á meðal þeirra eininga var starfssemi Carnitech sem keypt var í fyrra til að styðja við frekari vöxt félagsins.

Stefnan er skýr, verkefnið framundan er að aðlaga rekstur að stefnu félagsins. Einfaldara skipulag Marel mun gera okkur kleift að auka þjónustu við viðskiptavini okkar. Við munum taka varfærin skref í þá átt að samþætta einingar sem þjóna sömu þörfum viðskiptavina og byggja á samskonar grunntækni. Framleiðslueiningar Marel eru dreifðar og sveiflur í nýtingu á þeim veldur óhagræði. Framundan er hámörkun á framleiðslukerfinu. Við höfum með formlegum hætti hafið ferli við að skerpa á áherslum með það að leiðarljósi að gera fyrirtækið skilvirkara (e. simpler, smarter and faster). Markmið okkar er að ná yfir 100 milljónum í rekstrarhagnað árið 2017.“