Kaymer: Sagði stöðugt við sjálfan mig að ég gæti sigrað þetta mót

Martin Kaymer sigraði á Opna bandaríska meistaramótinu sem kláraðist um helgina en mótið fór þetta árið fram á Pinehurst velli nr.2 í Norður-Karólínu. Sigur Kaymer var nánast aldrei í hættu en hann lék óaðfinnanlegt golf frá fyrsta degi og sigraði mótið að lokum með átta högga mun.

Kaymer skaust upp á stjörnuhimininn í golfheiminum árið 2008 með því að sigra á Abu Dhabi meistaramótinu á Evrópumótaröðinni en frá 2008 til 2011 sigraði hann á 11 atvinnumótum, þar af á sínu fyrsta risamóti. Það var á PGA-meistaramótinu árið 2010 sem fram fór á Whistling Straits vellinum en Kaymer sigraði Bubba Watson í bráðabana um titilinn.

Týndi sveiflunni og hætti að sigra

Undanfarin ár hafa þó verið mögur fyrir Kaymer en hann sigraði ekkert mót á Evrópumótaröðinni á árunum 2012 og 2013. Hann féll í kjölfarið niður í 63. sæti heimslistans og á tímabili átti hann í miklum erfileikum með að komast í gegn um niðurskurðinn í flestum mótum sem hann tók þátt í. Þrátt fyrir það átti hann eftirminnileg augnablik en fáir golfáhugamenn gleyma því þegar að hann setti niður sigurpúttið í Ryderbikarnum á Medinah árið 2012 og fullkomnaði ótrúlega endurkomu Evrópuliðsins.

Aftur kominn á meðal þeirra bestu

Þjóðverjinn virðist þó vera búinn að finna sitt besta form aftur þessa dagana en hann sigraði einnig á Players meistaramótinu fyrr á árinu og segist vera byrjaður að sveifla kylfunni betur. „Ég var ekki sáttur við hvernig ég var að hitta boltann á sínum tíma og það tók mikla vinnu að koma sveiflunni aftur í lag. Undanfarna mánuði hef ég þó verið að slá boltann mun betur og á ýmsa vegu sem veitir manni aukið sjálfstraust.“

Þá segir Kaymer að lykillinn að sigrinum um helgina hafi verið hugarfarið. „Ég sagði við sjálfan mig alveg frá byrjun að ég gæti sigrað þetta mót, ég var stöðugt að minna mig á það. Ef maður trúir því og tekur bara eitt högg í einu þá er allt hægt.“