Mótmæla þörf rafrænna skilríkja

Neytendasamtökin krefjast þess að fyrst hægt var að sækja um höfuðstólalækkun með veflykli Ríkisskattstjóra, verði hægt að staðfesta lækkunina með sama hætti. Engin ástæða hafi verið gefin um að veflykilinn teljist ekki lengur örugg leið.

„Ef ástæða þessa er sú að veflykillinn telst ekki lengur örugg leið þá ætlast Neytendasamtökin til þess að fram komi haldbærar skýringar og frekari rökstuðningur vegna þess og þá einnig að skýrt verði  hvers vegna veflykillinn hafi þá verið notaður um árabil, og nú síðast fyrir nokkrum mánuðum, við gerð skattframtala.“

Þetta kemur fram í tilkynningu á vef Neytendasamtakanna.

Þar segir að veflykill Ríkisskattstjóra hafi verið notaður um árabil til að telja fram og skila skattaframtali, þar sem fram komi margvíslegar persónuupplýsingar. Ljóst sé að tugþúsundir einstaklinga verði að óbreyttu að verða sér út um rafræn skilríki á skömmum tíma til að geta samþykkt höfuðstólalækkunina.

„Rafræn skilríki hafa, þrátt fyrir áralangan undirbúning, ekki enn fest sig í sessi og virðist vera ýmsum vandkvæðum bundið að verða sér úti um þau.“