Keypti þriðjungshlut í Kosmos og Kaos

Bandaríska fyrirtækið UENO LLC, sem kemur að hönnun vefsíðna á borð við Google og Youtube, hefur keypt þriðjungshlut í íslenska vefhönnunarfyrirtækinu Kosmos & Kaos.

Fyrirtækið var stofnað fyrir fjórum árum af þeim Guðmundi Bjarna Sigurðssyni og Kristjáni Gunnarssyni. Í fréttatilkynningu þeirra um söluna segir að UENO LLC, sem er með höfuðstöðvar í San Francisco, sé eitt það eftirsóttasta á sviði vefhönnunar í heiminum.

„Fjárfestingin mun gera okkur kleift að stækka Kosmos & Kaos og fjölga bæði starfsfólki og viðskiptavinum,“ segir Kristján Gunnarsson, framkvæmdastjóri fyrirtækisins. Tólf starfsmenn eru á skrifstofum fyrirtækisins í Reykjavík og Reykjanesbæ.

Í tilkynningunni segir einnig að hlutur UENO LLC geti farið upp í 50 prósent samkvæmt ákvæðum kaupsamningsins. Gunnar Leó Gunnarsson, forsvarsmaður bandaríska fyrirtækisins hér á landi, verður stjórnarformaður Kosmos & Kaos.

„Við skoðuðum nokkur íslensk fyrirtæki sem komu til greina sem fjárfestingarkostir fyrir UENO en ákváðum á endanum að kaupa í Kosmos & Kaos. Bæði leist okkur vel á þeirra listrænu nálgun og hæfni starfsfólksins og svo höfum við mjög svipaða sýn á hvernig við viljum byggja fyrirtækin okkar upp,“ segir Gunnar í tilkynningunni.