Vísitala neysluverðs lækkar

Vísitala neysluverðs miðuð við verðlag í september er 422,6 stig samkvæmt Hagstofu Íslands og lækkaði hún um 0,12 prósent frá fyrri mánuði. Vísitala neysluverðs án húsnæðis er 395,7 stig og lækkaði um 0,43 prósent.

Það sem hafði mestu áhrif á vísitöluna er að flugfargjöld til útlanda lækkuðu um 28,9 prósent, en kostnaður vegna eigin húsnæðis hækkaði um 1,4 prósent. Þá er sumarútsölum nánast lokið og verð á fötum hækkaði um 3,3 prósent.

Vísitalan hefur hækkað um 1,8 prósent á síðustu tólf mánuðum og vísitalan án húsnæðis hefur hækkað um 0,4 prósent. Síðustu þrjá mánuði hefur vísitala neysluverðs lækkað um 0,05 prósent sem jafngildir 0,2 prósenta verðhjöðnun á ári.