Svipmynd Markaðarins: Seðlabankastjóri CCP flytur til Akureyrar

„Ég tek við starfinu 1. júlí og er því á fullu við að undirbúa vistaskiptin og flytja mig og fjölskylduna í nýjan landshluta,“ segir dr. Eyjólfur Guðmundsson, aðalhagfræðingur CCP og nýráðinn rektor Háskólans á Akureyri (HA).

Eyjólfur hefur starfað hjá CCP síðast­liðin sjö ár. Sem aðalhagfræðingur fyrirtækisins hefur hann rýnt í og gefið ráð um hvernig best sé að stýra hagkerfi Eve-Online.

„Við fylgjumst með verðbólgu, framleiðslu, peningamagni í umferð, þátttakendafjölda og öðrum þáttum. Við höfum því heildarmynd af því hvernig hagkerfi leiksins er að þróast,“ segir Eyjólfur og svarar því játandi að hann sé seðlabankastjóri CCP.

Eyjólfur starfar einnig sem sviðsstjóri greiningardeildar CCP. Sérfræðingar deildarinnar gera nákvæmar greiningar á hegðun í leiknum, áskrifendatölum og því sem Eyjólfur kallar stafræna neyslu.

„Þetta er gert til að meta virði Eve-Online á hverjum tíma. Þessir tveir hattar, það er störf mín sem sviðsstjóri greiningar og aðalhagfræðingur, gera það að verkum að þarna er búið að blanda saman Þjóðhagsstofnun, Seðlabankanum og greiningardeildum bankanna í eina deild innan fyrirtækisins.“

Eyjólfur er stúdent frá Verslunarskóla Íslands og lauk BS-gráðu í hagfræði frá Há­skóla Íslands árið 1992. Hann lauk doktors­prófi í sömu fræðigrein frá Rhode Island University í Bandaríkjunum árið 2001. Á þeim tíma starfaði hann við HA þar sem Eyjólfur starfaði í sjö ár áður en hann var ráðinn til CCP.

„Nýja starfið við Háskólann á Akureyri er meira leiðtogastarf en það sem ég hef verið að gera síðustu árin. Það er nákvæmlega það sem ég er að sækjast eftir. Þetta er spennandi verkefni og fram undan eru mörg tækifæri í þessu háskólasamfélagi sem við búum við á Íslandi,“ segir Eyjólfur.

Hann fæddist í Reykjavík en er uppalinn í Hafnarfirði. Spurður hvort hann eigi ættir að rekja norður til Akureyrar segir Eyjólfur að svo sé ekki.

„Ég er einn af þessum fáu Íslend­ingum sem hvái þegar ég er spurður hvaðan ég sé. Ég er héðan og þaðan og alls staðar. Ég bý þar sem hatturinn minn er hverju sinni þótt vissulega hafi ég fengið tilfinningu um að ég væri að flytja heim þegar ég tók ákvörðun um að flytja aftur norður.“

Eyjólfur segir áhugamálin flest tengjast útivist í íslenskri náttúru.

„Ég nýt íslenskrar náttúru. Annars vegar með því að ganga á fjöll og fara á skíði. Hins vegar nýt ég útsýnisins úr flugstjórnarklefum lítilla svif- og vélflugvéla sem ég hef gaman af að fljúga.“

Ásdís Gíslason, markaðsstjóri Orku náttúrunnar

„Við Eyjó erum búin að vera vinir í 30 ár, eða síðan í Versló. Við eigum góðar minningar frá þessum árum, til dæmis skemmtilegt sumar í Noregi þar sem Eyjó var duglegur að læra norskuna, ólíkt okkur hinum ferðafélögunum.

Á seinni árum hefur samvera með fjölskyldunni og göngur verið ómissandi hluti af okkar vináttu. Hann hefur líka svo skemmtilega sýn á lífið og tilveruna og kemur iðulega með nýtt sjónarhorn inn í dægurmálaþras og eru ófá gullkornin sem hafa fallið hjá honum á slíkum stundum.“

Pétur Jóhannes Óskarsson, heimspekinur

„Eyjólfur er skemmtilega víðsýnn, hagsýnn og framsýnn. Hann er einnig alltaf kennari sem er tilbúinn að gefa af sér, bjóða ráð og koma með tillögur að úrbótum ef maður leitar eftir þeim.

Hann er auk þess mjög duglegur að leita sér ráða ef honum finnst hann þurfa á því að halda. Að hafa haft hann sem næsta yfirmann í nokkur ár var mikil og góð lífsreynsla, bæði lærði ég mikið af honum og sá fagmann að störfum – nokkuð sem er erfitt að meta til fjár. Takk Eyjólfur!“