Actavis kaupir Forest Laboratories á 2.830 milljarða

Actavis plc, móðurfélag Actavis á Íslandi, hefur keypt bandaríska lyfjafyrirtækið Forest Laboratories fyrir 25 milljarða dala, sem svarar til rúmlega 2.830 milljarða króna.

Gert er ráð fyrir að kaupin gangi í gegn um mitt ár og að sameiginleg ársvelta árið 2015 verði um fimmtán milljarðar dala, um 1.700 milljarðar króna. Sameiningin á ekki að hafa áhrif á starfsemi Actavis á Íslandi.

„Gangi kaupin í gegn, sameinast þau tvö lyfjafyrirtæki heims sem eru að vaxa hvað hraðast á sérlyfjasviði,“ segir í tilkynningu Actavis á Íslandi. Þar segir að lyfjum í þróun muni fjölga verulega.

Forest Laboratories er með höfuðstöðvar í New York í Bandaríkjunum og hefur sérhæft sig í sérlyfjum og frumlyfjum. Paul Bisaro, stjórnarformaður og forstjóri Actavis samstæðunnar mun leiða fyrirtækið áfram en Brent Saunders, forstjóri Forest Laboratories tekur sæti í stjórn félagsins.