Marel áfram bakhjarl Snilldarlausna

Marel og Klak Innovit undirrituðu síðastliðinn fimmtudag áframhaldandi samning um Snilldarlausnir Marel, hugmyndasamkeppni framhaldsskólanna.

Keppnin gengur út á að virkja ímyndunaraflið og gera sem mest virði úr einföldum hlut, að því er fram kemur í tilkynningu Marel. Afurðin sem þátttakendur útbúa er svo í formi myndbands sem sýnir fram á virkni eða virði hlutarins.

Undirritunin þýðir að Marel mun áfram verða bakhjarl keppninnar, en hún hefur verið haldin frá árinu 2009.

„Sú breyting hefur hinsvegar orðið að Snilldarlausnir Marel verða nú haldnar í febrúar og mars í stað nóvember og því engin keppni árið 2013. Marel mun eiga fulltrúa í dómnefnd og jafnframt halda lokahóf fyrir þátttakendur í lok mars.

Undirbúningur keppninnar er hafinn og verða Snilldarlausnir Marel kynntar í framhaldsskólum landsins á næstu vikum. Keppendur hafa febrúarmánuð til að þróa lausnir, framkvæma þær og loks taka upp myndband af snilldarlausn sinni.

Undanfarin þrjú ár hafa framhaldsskólanemar unnið með ákveðinn hlut hverju sinni; herðatré, pappakassa, dós en árið 2012 gátu þátttakendur valið hlut að eigin vali. Í ár ganga Snilldarlausnir Marel út á að auka virði flösku,“ segir í tilkynningunni.