Íslandsbanki hagnast um 8,3 milljarða

Afkoma Íslandsbanka var jákvæð um 8,3 milljarða króna á fyrsta ársfjórðungi 2014, samanborið við 4,6 milljarða á sama tímabili 2013.

Munurinn liggur að stærstum hluta í hagnaði vegna sölu eignarhluta í aflagðri starfsemi, samkvæmt tilkynningu bankans.

Eiginfjárhlutfall bankans var 30,3% og hreinar vaxtatekjur 6,6 milljarðar króna. Heildareignir voru 884 milljarðar sem er 2 prósenta aukning frá árslokum 2013.

Birna Einarsdóttir, bankastjóri Íslandsbanka, segir bankann ánægðan með afkomu fyrsta ársfjórðungs þar sem hún sýni aukna arðsemi, hækkun þóknanatekna og áframhaldandi lækkun kostnaðar milli ára,

„Svo virðist sem markaðurinn hafi tekið við sér sem endurspeglast í aukinni eftirspurn eftir útlánum sem hafa vaxið um 2% frá áramótum. Grunnrekstur bankans styrkist og 16% aukning var á þóknanatekjum á milli ára.

Hagræðingarverkefni  hafa gengið vel, við höfum haldið áfram að hagræða í útibúaneti bankans og nýverið var tilkynnt um  sameiningu tveggja útibúa og breytingu á afgreiðslu bankans í Kringlunni í sjálfsafgreiðslu. Raunlækkun á stjórnunarkostnaði var 7,4% á milli ára og kostnaðarhlutfallið var 55,1% sem er í takt við langtímaáætlanir bankans," segir Birna.