Vænta 2,4 prósent verðbólgu

Væntingar markaðsaðila um ársverðbólgu til skamms tíma hafa lækkað frá því í febrúar samkvæmt könnun Seðlabankans.

Þetta kemur fram í frétt á vef bankans. Miðað við miðgildi svara í könnuninni, sem gerð var nú í maí, vænta markaðsaðilar þess að ársverðbólga verði að meðaltali um 2,4 prósent á öðrum og þriðja fjórðungi þessa árs, sem er um 0,4-0,6 prósentum minni verðbólga en gert var ráð fyrir í síðustu könnun.

Samkvæmt könnuninni vænta markaðsaðilar þess að ársverðbólga verði 3,1 prósent eftir eitt ár og 3,5 prósent eftir tvö ár sem er svipuð niðurstaða og í könnuninni í febrúar.

Í könnuninni í maí voru þeir markaðsaðilar sem væntu þess að verðbólga yrði ekki við 2,5% markmið Seðlabankans til lengri tíma litið beðnir um að svara því hvers vegna þeir teldu að svo yrði ekki. Langstærstur hluti þeirra taldi ytri skilyrði vera meginástæðu þess að bankinn geti ekki haldið verðbólgu við markmið til langs tíma litið.



Könnunin fór þannig fram að Seðlabankinn spurði um væntingar markaðsaðila til ýmissa hagstærða, svo sem verðbólgu. Leitað var til 31 markaðsaðila á skuldabréfamarkaði og var svarhlutfallið 74 prósent.