Erfiðara að laða hingað erlenda sérfræðinga

Ísland stendur höllum fæti í samkeppni við önnur lönd þegar kemur að því að laða hingað sérhæft erlent starfsfólk. Hér hafa ekki verið innleidd lög sem ætlað er að bæta umhverfi erlendra sérfræðinga eins annars staðar á Norðurlöndunum.

Þetta er á meðal þess sem kemur fram í nýrri Skoðun Viðskiptaráðs Íslands sem birt var í gær. Þar segir einnig að skattaumgjörð sérfræðinga sem hingað koma sé óhagstæðari hérlendis en víða annars staðar og að afgreiðsla dvalar- og atvinnuleyfa taki lengri tíma.

Viðskiptaráð segir stjórnvöld þurfa að bæta úr þessu svo alþjóðleg atvinnustarfsemi geti vaxið hér og stutt við aukinn útflutning á komandi árum.

„Þar má helst nefna fjóra þætti; samræmingu við önnur Norðurlönd í löggjöf um skattalega hvata, skjótvirkara afgreiðsluferli fyrir dvalar- og atvinnuleyfisumsóknir, aukið framboð alþjóðlegs náms á grunnskólastigi og lágmörkun neikvæðra áhrifa gjaldeyrishafta,“ segir í Skoðuninni.