Kýpverjar létta á höftunum

Kýpversk stjórnvöld léttu á föstudag öllum innlendum fjármagnshöftum sem hvílt hafa á landinu í rúmlega eitt ár í kjölfar falls bankakerfisins þar í landi.

Fjármálaráðherra landsins, Harris Georgiades, sagði þá að Kýpverjar gætu að nýju stofnað bankareikninga í landinu óhindrað. Hann tók þó fram að enn væru í gildi allar takmarkanir sem varða viðskipti við útlönd. Kýpversk stjórnvöld stefna þó að því að slík höft verði afnumin undir lok þessa árs.

Íbúar Kýpur mega nú einnig innleysa ávísanir sem nema hærri upphæðum en 50 þúsund evrum og fyrirtæki ávísanir að upphæð 200 þúsund evrur. Afléttingin kemur rétt rúmlega fjórtán mánuðum eftir að Kýpur hlaut tíu milljarða evra neyðarlán frá öðrum Evrópuríkjum og Alþjóðagjaldeyrissjóðnum.

Kýpverska fjármálaráðuneytið sagði að jákvæðar horfur hjá alþjóðlegum matsfyrirtækjum og aukið alþjóðlegt traust á efnahagskerfi landsins hafi skipt sköpum í því að létta á höftunum.