Hagnaður 5,1 milljarður króna

Landsbankinn hagnaðist um 5,1 milljarð króna á þriðja ársfjórðungi. Fyrirtækið var rekið með 6,7 milljarða hagnaði á sama tíma í fyrra og er samdrátturinn milli ára því 24 prósent.

Afkoma bankans á fyrstu níu mánuðum ársins var því jákvæð um 20 milljarða króna miðað við 22 milljarða hagnað á sama tímabili 2013.

Í uppgjörstilkynningu bankans segir að lækkunin skýrist aðallega af hærri sköttum, sem hækki um tvo milljarða króna milli ára. Bankinn hafi greitt 8,7 milljarða í tekjuskatt og sérstaka skatta á fjármálafyrirtæki á fyrstu níu mánuðum ársins. „Lækkun á vaxtamun og á verðbréfamörkuðum hefur áhrif til lækkunar á tekjum en á móti kemur virðisaukning útlána, meðal annars vegna hratt lækkandi vanskila.

Bæði inn- og útlán hafa vaxið töluvert sem er til marks um vaxandi umsvif í hagkerfinu,“ segir Steinþór Pálsson, bankastjóri Landsbankans, í tilkynningunni.