Kerfi Advania í flugmóðurskipum breska hersins

„Samningurinn þýðir að við munum sjá um upplýsingakerfi bresku samtakanna á öllum þeim stöðum þar sem breski herinn er með aðsetur, hvort sem það er í Þýskalandi, Afganistan, á Falklandseyjum eða um borð í breskum flugmóðurskipum,“ segir Eyjólfur Magnús Kristinsson, framkvæmdastjóri rekstrarlausna Advania.

Fyrirtækið gerði í lok janúar samning við bresku samtökin NAAFI (The UK Navy, Army and Air Force Institutes), sem sjá um veitingaþjónustu og rekstur smásöluverslana fyrir breska heraflann, um að Advania hýsi, reki og endurskipuleggi allt upplýsingakerfi NAAFI. Samningurinn gildir til ársins 2019 og virði hans er um einn milljarður króna.

„Samtökin ákváðu á síðasta ári að gjörbylta sínu upplýsingakerfi því það þótti of stórt og dýrt. Farið var í útboð sem við tókum þátt í og þar vorum við langhlutskörpust. Við erum að leysa af hólmi tuttugu manna tölvudeild NAAFI með því að sinna störfunum hér á Íslandi með færra starfsfólki.“

Hugbúnaður upplýsingakerfisins er nú hýstur í Thor Data Center, gagnaveri Advania. Eyjólfur segir stjórnendur NAAFI hafa lagt mikla áherslu á að hugbúnaðurinn yrði geymdur í gagnaveri sem notar endurnýjanlega orkugjafa.

„NAAFI voru stofnuð af breska hernum árið 1921 en eru í dag eins konar sameignarfélag sem rekur veitingastaði, verslanir, keilusali og aðra þjónustu fyrir breska hermenn. Eitt af kerfunum sem samtökin kaupa af okkur, Navision, heldur utan um allan þeirra fjárhag, innkaup og posaviðskipti. NAAFI voru áður með sex til sjö kerfi en Navision kom í stað þeirra allra.“

Eyjólfur segir samninginn vera mikilvægt skref fyrir innlend upplýsingafyrirtæki.

„Það hefur stundum verið sagt að það sé erfitt að reka svona almenn tölvukerfi frá Íslandi út af fjarlægðum. En þarna erum við að reka hefðbundin kerfi sem eru öll staðsett á Íslandi og fara í gegnum þær gagnatengingar sem eru í boði frá landinu. Og þetta bara svínvirkar sem er ótrúlega gott dæmi um að það er hægt að reka svona kerfi frá Íslandi.“