Magnús Geir fór yfir fjárhagsstöðu RÚV með starfsmönnum

Boðað var til starfsmannafundar meðan starfsmanna RÚV í Efstaleitinu í morgun. Fundurinn var stuttur og snarpur og fór Magnús Geir Þórðarson, útvarpsstjóri, yfir fjárhagstöðuna hjá stofnuninni.

Starfsmönnum var greint frá þeirri hagræðingu sem hefur átt sér stað innan RÚV. Einnig talaði Magnús um að enginn svör hefðu fengist frá ráðamönnum þjóðarinnar varðandi þá fjármunni sem stofnunin fær á næsta ári.

Magnús varpaði meðal annars upp glæru á fundinum með fyrirsögninni „Mikil umræða“. Á glærunni voru útklippur úr dagblöðum og fór Magnús yfir fjölmiðlaumfjöllun gagnvart stofnuninni síðustu mánuði.

Mikið hefur verið fjallað um rekstur RÚV í fjölmiðlum á undanförnum misserum en fjárhagsstaða Ríkisútvarpsins er erfið.

Félagið er yfirskuldsett og nema skuldir RÚV 5,5 milljörðum króna, stærstur hluti vegna lífeyrissjóðsskuldbindinga félagsins.

Í aðsendri grein sem birtist í Fréttablaðinu í morgun segir útvarpsstjórinn að á undanförnum árum hafi ríkið tekið til sín hluta af útvarpsgjaldinu á hverju ári og nýtt í óskyld verkefni þrátt fyrir óbreyttar lagakvaðir um víðtæka þjónustu og skuldbindingar RÚV.

„Útvarpsgjaldið sem hver einstaklingur greiðir er sambærilegt að krónutölu við það sem þekkist hjá öðrum norrænum ríkisfjölmiðlum og nokkru lægra en hjá BBC og fleiri ríkisstöðvum í Evrópu. Stjórn RÚV hefur óskað eftir því að félagið fái útvarpsgjaldið óskert svo að tryggja megi áframhaldandi öflugt Ríkisútvarp, með sambærilegar skyldur og hlutverk og verið hefur.“

Magnús segir að óbreytt útvarpsgjald dugi til að standa undir öflugri dagskrá og nauðsynlegum úrbótum á dreifikerfi. Ekki sé þörf á að hækka gjaldið eða veita sérstök fjárframlög til RÚV.